街頭祖霸王是運動、動作、喜劇類英語片，現正上映中。電影由查理史東三世執導，主要演員包括路威賀維、基利艾榮、奧尼爾等…
劇情簡介
街波領隊丁屎(路威賀維 飾)傾盡畢生積蓄，為球隊報名參加喺街頭籃球聖地──洛克公園舉行嘅大賽，點知成隊波畀宿敵撬走，獎金夢碎，連條女都被撬埋。絕望之際，丁屎竟然遇到傳說中嘅隱世街場巨星祖伯Uncle Drew (基利艾榮 飾)，仲氹掂佢出山再次披甲。祖伯為咗證明「鋒利過嘅刀，都有再鋒利嘅一日」，特別要求搵返當年嘅隊友(奧尼爾、米拿、韋伯、羅賓遜、萊斯莉 飾)拍住上，勢要畀而家班後生睇吓…波，始終係老嘅辣！
電影資料
海報及圖片
上映戲院
未有戲院上映資料，請密切留意。
關於《街頭祖霸王》
Uncle Drew係百事可樂短片中嘅虛構角色，咪睇佢成頭白髮兼凸腩，呢位阿伯後生時其實係街場巨星，基本功紮實，得分、過人技術自然比後生仔更多花臣。
由NBA勁旅塞爾特人巨星控衛基利艾榮(Kyrie Irving)化老妝扮演嘅Uncle Drew，每次出場例必俾人笑屎波，但熱完身就即刻嚟料，crossover、急停跳射、超遠三分、剷籃、偷波、入樽樣樣齊，令全場後生仔大跌眼鏡。百事2012年推出第一集網上短片已經瘋魔全球，系列單計Youtube嘅總點撃率至今已經破億，而喺各大社交平台嘅總瀏覽量更超過17.5億﹗難怪會吸引《移動迷宮》(Maze Runner)系列監製馬提保雲(Marty Bowen)將系列搬上大銀幕。
充滿喜劇細胞嘅艾榮今次會繼續親身上陣施展球技，仲搵埋多位NBA殿堂級人物組隊落場，包括4屆NBA總冠軍「巨無霸」奧尼爾(Shaquille O’Neal)、三分神射手「牙擦蘇」米拿(Reggie Miller)、帝王傳奇前鋒韋伯(Chris Webber)、三屆入樽王尼特羅賓遜(Nate Robinson)及4屆奧運女籃金牌得主萊斯莉(Lisa Leslie)，再加上剛剛憑《訪‧嚇》(Get Out)勇奪MTV電影大獎「最佳喜劇演出」的路威賀維(Lil Rel Howery)，帶住呢隊明星隊，肯定會傾盡全力大放笑彈！